Klimaviðgerð 2025: Nú er ber til at søkja!
Komandi summar verður aftur skipað fyri klimaviðgerðartúri í Kroatia. Giktafelag Føroya og Føroya Psoriasisfelag umsita hesa tænastu í felag, við stuðli frá Føroya Løgtingi. Tí vilja vit, vegna feløgini, boða frá, at tað nú ber til at søkja um klimaviðgerð fyri 2025.
Fortreytirnar fyri at søkja eru, at tú:
- stríðist við psoriasis ella gikt, og
- ert limur í Giktafelag Føroya ella Føroya Proriasisfelag.
Umsøkjarar, sum ikki liva upp til fortreytirnar at søkja, verða soldaðir frá. Tí er neyðugt at tú tryggjar tær, at tú ert limur í øðrum av feløgnum.
Um ferðina:
Talan er um eitt intensivt venjingartilboð, sum fer fram undir bestu klimatisku viðurskiftum, á einum viðgerðar- og venjingardepli í Kroatia.
Les um viðgerðardepilin við at trýsta á leinkið her.
Les meira um Klimaviðgerð við at trýsta á leinkið her.
Hóast endalig dagfesting ikki er funnin fyri ferðina enn, vænta vit, at klimaviðgerðin hesaferð verður um hálvan juni til hálvan juli 2025. Meira verður at frætta um hetta seinni.
Soleiðis søkir tú:
- Prenta umsóknarblaðið úr, tak tað við til egnan kommunulækna. Umsóknarblaðið kann takast niður niðast á hesari síðuni.
- Hjá kommunulæknanum verður umsóknarblaðið útfylt.
- Send útfylta umsóknarblaðið til visiterandi læknan.
Teldupostadressan er at finna í umsóknarblaðnum, og umsóknarfreistin at senda til visiterandi læknan er sunnudagin 9. februar 2025 kl. 12.00.
Umsøkjarar fáa svar umvegis telduposti.
Játtanin í ár er tann sama sum í fjør, og er hon áljóðandi 500.000 fyri hvørt felagið. Stóru príshækkingarnar, sum vit hava sæð seinastu tíðina hevur eisini rakt klimaviðgerðina, og tí røkka somu pengar í ár ikki líka langt sum í fjør, og tí kann væntast at nakað færri fáa hendan viðgerðarmøguleika í boði. Vit arbeiða tó fyri at hækka talið á sjúklingum so nógv sum yvirhøvur gjørligt.
Vit viðmæla øllum at søkja, sum meta seg hava tørv á klimaviðgerð.